✍️ هنــــــــــــد جمــــــــــال ،،،
الجمعة 11سبتمبر2026/ 01:35م
قبل ما ابنك يدخل المدرسة السنة دي اسأليه سؤال واحد بس
لو كنت مكان طفل مختلف عنك
كنت هتحب الناس تعاملك إزاى؟
السؤال ده ممكن يعلّم ابنك حاجة مش هيتعلمها من أي كتاب
في المدرسة مش كل الأطفال هيدخلوا بنفس القدرات ولا بنفس الشكل ولا بنفس طريقة الكلام ولا بنفس سرعة التعلم
وفي وسط الزحمة دي ممكن يكون فيه طفل صغير داخل المدرسة وهو شايل جواه خوف أكبر من سنه
طفل عنده متلازمة داون
طفل ممكن يتأخر شوية في الكلام
ممكن يحتاج وقت أطول عشان يفهم
ممكن تكون حركته أبطأ
ممكن يتعب في التعبير عن نفسه
لكن عنده قلب بيحس
وبيفرح ….وبيزعل ……وبيحب …….وبيفتكر
وأحيانًا كلمة واحدة من طفل ممكن تفرحه طول اليوم
وكلمة تانية ممكن تفضل وجعاه أيام
إحنا مش بنطلب من ولادنا يعملوا حاجة صعبة
إحنا بس عاوزين نربي فيهم الرحمة
لما يشوفوا طفل مختلف ما يخافوش منه
ولما يسمعوا طريقة كلام مختلفة ما يضحكوش
ولما يشوفوا حركة مختلفة ما يقلدوش
ولما يلاقوا طفل مش عارف يدخل في اللعب يساعدوه يدخل
ولما يلاقوه واقف لوحده يكون هو صاحبه
ولما حد يبدأ يضحك عليه يكون هو أول واحد يقول لأ
مش عشان الطفل ده ضعيف
لكن عشان ابني اتعلم إن القوة الحقيقية مش إنك تقدر تضحك على غيرك
القوة إنك تقدر تحميه
مش إنك تبقى وسط المجموعة وتسيب طفل لوحده
القوة إنك تمد إيدك ليه
ومش معنى إن ابني مختلف عن طفل تاني إن واحد فيهم أحسن من التاني
كل طفل له طريقته
وله قدراته
وله سرعته
وله حاجات جميلة يمكن إحنا لسه ما اكتشفناهاش
وأنا نفسي كل أم قبل ما تعلم ابنها أول حرف وأول رقم وأول واجب في السنة الجديدة
تعلمه إن الإنسان أهم من الدرجة
وإن القلب أهم من الشكل
وإن الإختلاف مش عيب
وإن الطفل اللي محتاج مساعدة النهارده ممكن يكون سبب في تعليم ابنك أعظم درس في حياته
إلى كل أم… إلى كل أب
ممكن ابنك بكرة يشوف طفل داون في الفصل
ممكن يبقى جنبه في الأتوبيس
ممكن يقعد معاه في الفسحة
ممكن يبقى معاه في نفس الفريق
خليه يدخل الموقف ده وهو فاهم إن قدامه إنسان مش حالة
خليه يعرف إن طفل داون مش محتاج حد يبص له بنظرة شفقة
هو محتاج صاحب
محتاج زميل يحترمه
محتاج حد يستناه لما يتأخر
محتاج حد يفرح معاه لما ينجح
محتاج حد يشجعه لما يحاول
ومحتاج مدرسة يكون فيها له مكان حقيقي زي باقي الأطفال
وأرجوكم ما تقولوش لولادكم خليك بعيد عنه لأنه مختلف
قولولهم خليك قريب منه لأنك ممكن تكون الشخص اللي يخلي يومه أجمل
ما تقولوش له اوعى تضحك عليه
علموه من البداية إننا لا نسخر من أحد
ما تقولوش له ده مسكين
قولوله ده زميلك وصاحبك وإنسان له حق عليك
يمكن إحنا مش هنقدر نغيّر كل اللي في المجتمع في يوم واحد
لكن نقدر نغيّر قلب طفل واحد
والطفل ده بكرة هيكبر
وهيبقى أب أو أم
وهيعلّم أولاده نفس اللي اتعلمه منكم
علشان كده تربية ابنك على احترام المختلف مش درس لسنة دراسية واحدة
دي تربية لمجتمع كامل
وفي كل مرة ابنك يختار يكون رحيم بدل ما يكون ساخر
وفي كل مرة يختار يساعد بدل ما يتفرج
وفي كل مرة يختار يحتوي طفل بدل ما يستبعده
اعرف إنك زرعت جواه إنسان حقيقي
وقبل ما المدرسة تفتح أبوابها
افتحوا قلوب ولادكم الأول
علموهم إن في أطفال هتحتاج وقت أطول
وفي أطفال هتتكلم بطريقة مختلفة
وفي أطفال هتتعلم بطريقة مختلفة
لكن كلهم يستحقوا نفس الأمان
نفس الاحترام
نفس الفرصة
ونفس الإحساس الجميل
إني أنا كمان ليا مكان هنا
يمكن كلمة بسيطة من ابنك
ابتسامة منه
دعوة للعب
كرسي جنبه
إيد تمتد لطفل كان واقف لوحده
تكون بالنسبة لطفل تاني ذكرى جميلة يعيش بيها سنين
وأجمل حاجة ممكن يرجع بيها ابنك من المدرسة آخر السنة
مش شهادة عليها درجات عالية
لكن قلب اتعلم إن الدنيا مش معمولة علشانه لوحده
وإن أجمل نجاح للإنسان
إنه يسيب أثر طيب في قلب إنسان تاني
ربوا أولادكم على الرحمة
لأن الطفل اللي يتعلم يحترم المختلف النهارده
هو الإنسان اللي هيخلي بكرة أرحم على كل أطفالنا.
