كتبت: سميرة وجيه،، أخصائيه الصحه النفسيه واستشاري الإرشاد الأسري.
نفحات عن الصحة النفسية
1. طمِّن قلبك
صحتك النفسية مش رفاهية… دي أمان روحك. خدي بالك منها زي ما بتخافي على أغلى حد عندك.
2. مشاعرك مش ضعف
البكاء، القلق، الحزن… مش علامات ضعف. دي إشارات إنك إنسانة حقيقية، بتشعري وبتتفاعلي، وده جمال مش نقص
3. كلنا محتاجين حضن
مش دايمًا الحل في الكلام… ساعات حضن حقيقي أو حتى كلمة حنونة تهدي نار جوه القلب.
4. العزلة مش دايمًا راحة
ممكن تبقيي محتاجة وقت لنفسك، بس لو طولتي فيها… اسألي نفسك: “أنا بختار ده؟ ولا بتهرب؟”
5. استني على نفسك شوية
مش لازم تنجحي بسرعة، ولا تتغلبي على كل حاجة في يوم وليلة. النفس زي الزرعة… محتاجة وقت، شمس، ومية حب.
6. اختاري اللي يسمّعك
مش كل الناس هتفهمك، بس فيه ناس بتعرف تسمع بقلبها… دوري عليهم، تمسكي بيهم، وكوني أنتِ كمان سند ليهم.
7. العافية مش بس في الجسد
العافية كمان إنك تصحي الصبح وقلبك هادي، وعقلك مش متخانق معاه. دي النعمة اللي تستاهليها.
8. لو تعبتِ، احكي لحد بيحبك
فيه ناس بتحبك، بتخاف عليكي ومستعدة تكون جنبك. متخافيش تقولي “أنا محتاجة”.
