بقلم / سميرة وجيه
أخصائية الصحة النفسية واستشاري الإرشاد الأسري
الخميس 4 ديسمبر2025/ 12:35ص
التعلّق جزء طبيعي من العلاقات الإنسانية؛ كل واحد فينا يحتاج يشعر بالأمان والانتماء. لكن التحوّل من ارتباط صحي إلى تعلّق مرضي ممكن يخلّي الشخص يفقد اتزانه، ويعلّق سعادته بالكامل على وجود طرف واحد في حياته. هنا يبدأ الألم، ويبدأ الشخص يفقد نفسه بدل ما يبني علاقة.
1. اعرف العلامات بدري
التعلّق المرضي له مؤشرات واضحة:
التفكير المستمر في شخص واحد طول اليوم.
فقدان القدرة على اتخاذ قرارات بدون رأيه.
القلق الشديد لو تأخر في الرد.
الشعور إن الحياة “بتقف” لو غاب.
لو العلامات دي بتتكرر، يبقى محتاج توقف وتعيد تقييم العلاقة.
2. قوّي علاقتك بنفسك قبل أي علاقة تانية
أكتر سبب بيدفع للتعلّق المرضي هو “الفراغ الداخلي”.
املَيه بـ:
اهتماماتك.
صحّتك النفسية.
أهداف صغيرة تحققها.
وقت لنفسك بعيد عن أي علاقة.
الشخص اللي بيعرف قيمته بيبقى صعب يتعلّق تعلق مؤذٍ بأي حد.
3. الحدود مش قسوة… دي حماية
حطّ لنفسك قواعد صحية ،،
وقتك مش كله متاح.
ردودك مش لازم تكون فورية.
مش كل حاجة لازم تتشارك.
من حقك تقول لا من غير ذنب.
الحدود بتخلي العلاقة متوازنة وتمنعك من الذوبان في الطرف التاني.
4. افتكر دايمًا إن العلاقات جزء من الحياة مش كلّها
مهما كان الشخص مهم، لازم تفضل ليك حياة خارج العلاقة:
شغل، أصدقاء، أسرة، شغف…
كل ما جوانب حياتك تكون متنوعة، كل ما تعلقك يكون صحي ومعتدل.
5. اعمل مراجعة لنفسك بانتظام
اسأل نفسك،،،
ليه أنا متمسّك بالشخص ده بالشكل ده؟
هل العلاقة بتضيفلي ولا بتسحب مني؟
هل أنا خايف أفقده ولا خايف أكون لوحدي؟
الإجابات دي بتكشف جذور التعلّق وتخلّيك تبدأ تصلّح من جوّا.
6. اطلب مساعدة وقت اللزوم
مفيش عيب في إنك تستعين بأخصائي نفسي.
أوقات التعلّق بيكون مرتبط بجروح قديمة أو نقص أمان محتاج علاج مش نصايح.
