كتبت : هند جمال
قصة (الاسراء و المعراج )
يعني ايه معجزة الاسراء و المعراج.
دي رحلة مدتها كانت من بعد صلاة العشا لحد قبل صلاة الفجر .معجزة محدش يقدر يتخيلها . سيدنا جبريل جة لسيدنا محمد عليه الصلاة و السلام و اخده من بيته ووداه عند الكعبة في مكة المكرمة .و من هناك ركب الرسول عليه افصل الصلاة و السلام البراق و اللي بيقال انها دابة ضخمة جدا لونها ابيض تشبه الحصان و ليها اجنحة .
و مفيش لحظات الا ووصل رسول الله مع جبريل للمسجد الاقصي اللي في دولة فلسطين و هي دي رحلة الاسراء اللي اتنقل فيها سيدنا محمد من البيت الحرام الي المسجد الاقصي . و دخل الرسول عليه افضل الصلاة و السلام وشاف حاجة عجيبة جدا شاف كل و الرسل اللي سبقوه . ايوة شاف سيدنا ابراهيم و اسماعيل و موسي و عيسي … و …و …عليهم السلام كلهم طبعا .
و اول ما دخل الرسول سمع اقامة الصلاة . و لاقي جبريل بيوقفه في مكان الإمام ..يعني عايز سيدنا محمد يصلي امام بكل الانبياء و الرسل دول …ياااه تفتكروا ايه هي مكانة و منزلة سيدنا محمد عند ربنا اللي اختاره يصلي إمام بكل الانبياء اللي سبقوه.
و لما خلص الصلاة سيدنا محمد (عليه الصلاة و السلام ) خرج من المسجد هو و جبريل و ركبوا البراق و بدأت رحلة المعراج. فجأة سيدنا محمد لاقي نفسه صعد من الارض الي السما . و لما وصل للسماء الاولي شاف حاجة عجيبة شاف سيدنا ادم عليه السلام ابو البشر كلهم.
و كمان شاف ناس بتتعذب بشكل بشع و لما سأل مين دول .عرف ان دول الناس اللي بتظلم اليتامي و بتأخد أموالهم منهم و كمان المغتابين يعني اللي بيتكلموا عن الناس بطريقة وحشة من وراهم . و كمان الزناة .و اكلين الربا يعني الناس اللي بيسلفوا المحتاجين فلوس و يطلبوا منهم يردوا الفلوس و عليها فلوس زيادة كمان .
و لما صعد الرسول ( عليه افضل الصلاة و السلام ) مع جبريل للسماء الثانية شاف فيها سيدنا يحيي ابن زكريا و كمان شاف سيدنا عيسي ابن مريم .
و لما صعد مع جبريل للسماء الثالث شاف سيدنا يوسف عليه السلام .
و لما صعد مع جبريل للسماء الرابعة شاف سيدنا ادريس عليه السلام .
و لما صعد مع جبريل للسماء الخامسة شاف هارون اخوا سيدنا موسي عليه السلام .
و في السماء السادسة شاف سيدنا موسي عليه السلام .
و اخيرا بقي لما وصل سيدنا محمد ( عليه افضل الصلاة و السلام ) مع جبريل للسماء السابعة شاف سيدنا إبرهيم عليه السلام . و فيها سيدنا إبراهيم قال لسيدنا محمد ( وصل سلامي لامة المسلمين و قولهم ان الجنة جميلة ترابها طيب و ماءوها عذب )
و ان غراسها انك تقول : سبحان الله و الحمد لله و لا اله الا الله و الله أكبر )
و بعدها دخل سيدنا محمد الجنة و فضل يتفرج علي الحاجات اللي فيها ..شاف قصر لعمر ابن الخطاب عليه السلام . و شاف نهر الكوثر .
و كمان شاف نار جهنم و شاف اهل النار و هما بيتعذبوا فيها ازاي ..و شاف حارس النار …وصل جبريل عند طرف السماء السابعة ووقف و قال لسيدنا محمد …اتقدم انت لو انت اتقدمت هتدخل لكن انا لو اتقدمت هتحرق .
اتقدم سيدنا محمد ووصل عند مكان مفيش بشر و لا ملايكة وصلوا ليه قبل كدة. هو عرش الرحمن …و هناك كلم ربنا سبحانه و تعالي سيدنا محمد عليه الصلاة و السلام و فرض علينا الصلوات الخمس .
و بكدة انتهت رحلة المعراج ..
و كل سنة و انتم طيبين
