كتبت : سميرة وجيه
الثلاثاء 2ديسمبر2025
أخصائية الصحة النفسية واستشاري الإرشاد الأسري
الروح المُتعَبَة… ليه بنصحى منهكين حتى لو نمنا كويس؟
في زمن بقى فيه الجري عادة يومية، بقينا نصحى الصبح وإحنا لسه شايلين نفس الأحمال اللي نيمنا عليها. الغريب إن ساعات النوم تكون كفاية… لكن الطاقة صفر. ليه؟ لأن اللي بيتعب مش الجسد بس، الروح كمان.
في ناس بتصحى تعبانة لأنها قضت يومها كله في مراعاة الكل إلا نفسها. وفي ناس بتصحى مرهقة من معارك داخلية محدّش شايفها: كلمة اتبلعت، موقف اتسكت عنه، رغبة اتأجلت، أو حلم اتحط على الرف. الروح لما تتضغط… بتفصل. والجسد يتبعها.
الخبراء بيقولوا إن الإجهاد المزمن بقى أخطر من قلة النوم نفسها. لكن الحقيقة الأعمق إن الروح بتتعب لما نعيش ضد صوتنا الداخلي؛ لما نلبس وجوه مش بتاعتنا، ونحاول نكون أقوى من طاقتنا الحقيقية.
ولأن الحياة مش هتخفّ… لازم إحنا نخفّ عليها.
جرب تكتب آخر اليوم 3 مشاعر حسّيت بيهم. خد دقيقة تتنفس بعمق. ارفض حاجة واحدة مكنتش قادر عليها. واسمح لقلبك يقول “تعبت”… قبل ما يقول “أنا بخير”.
لأن الراحة مش في سرير مريح… الراحة في روح مرتاحة.
ويمكن أول خطوة إنك تعترف إنك محتاج ترتاح فعلًا.
