كتبت: هند جمال
في وقت بقت فيه العلاقات هشة، والقلوب فيها لعب كتير، لازم يبقى ليك قانون تحكم بيه حياتك… قانون يحمي سلامك النفسي وكرامتك قبل أي حاجة.
اللي عايز يبعد؟ ناوله المقص بإيدك.
ما تستناش حد يقطع علاقتك بيه على مراحل، ولا يفضل يسحب فيك حتة حتة.
لو واضح إنه زهق، اتغير، أو حتى قرر يلف ويمشي… ساعده وريح دماغك.
اللي عايز يخسرك؟ وصّله للباب.
مافيش حد بيمشي من حياتك بالغصب، الناس بتختار.
لو حد شاف إن خسارتك أريحله، ما تقفش في طريقه، افتحله الباب بنفسك وقولّه: “مع السلامة”.
اللي بيتلككلك؟ متتأخرش عليه.
اللي مستني منك غلطة عشان يبعد، ده كان ناوي من الأول.
ما تتعبش نفسك في التبرير، قولّه: “تمام، اعتبرني غلطت أهو، يلا مع ألف سلامة”.
اللي حط بينك وبينه طوبة؟ كملها سور.
العلاقات مابتمشيش بالعناد ولا الغموض.
لو حد بدأ يبعد، يتهرب، يحط حدود… كملها انت، ومتقربش تاني.
الكرامة مش لعبة.
واللي كتفه مايسندكش وانت مضايق؟ ما تسندش عليه وانت رايق.
اللي مش بيبان في وقتك الصعب، ما يستاهلش فرحة ولا ضحكة من وقتك الحلو.
السند الحقيقي مش في الضحك، السند بيبان وسط الدموع والتعب.
حافظ على قلبك، وخلّي نفسك دايمًا غالية.
اللي يستاهلك هيقرب لوحده، واللي يبعد… ماكانش ليه مكان من الأساس.
