كتبت : هند جمال
الوجع مبيتحكيش
مبيتحكيش ..الوجع مبيتحكيش
الجمله دي قالها صالح سليم بإنفعال في فيلم
(الشموع السوداء ) و نجاة بتسأله بإصرار .. مالك ؟!
حقيقيه أوي الجمله دي ..
كل إللي بتفضفض بيه ده مش الوجع الحقيقي .. ده شوية كلام على الوش .. مجرد عنوان لإحساسك !
لكن الوجع الحقيقي بيبقى جوه أوي .. إنت نفسك مبتعرفش حجمه !
مبيعرفهوش غير ربنا وبس .. ومبيهداش غير بلطف ربنا وبس .. فيبعتلك حد يطبطب عليك .. حاجات تتشغل فيها أوي ، متلحقش تفكر .. يديك الهمه تقرب منه اكتر وتلجأله .. حتى الصدمه وإنك مش مستوعب إللي حصل .. فيها لطف .. متستحملش لو إدراكك كامل !
بيديك مسكنات لحد ما الوجع تاخد عليه !!
أيوه تاخد عليه .. وهو ده إللي بنسميه ( نسيان ) لكن الوجع مبيتمسحش !
لولا النسيان منتحركش من كتر الأوجاع والحياه تقف !
كل ده آليات لُطف ربنا ..
الشيخ الشعراوي كان بيقول مينفعش تفكر في المصيبه قبل وقوعها لأنك بتفكر فيها من غير ما يكون اللطف نزل .. فصعب أوي نتحمل من غير لطف الله ..
الوجع هو علاقه خاصه جداً بينك وبين ربنا ..
(وَإِن تَجْهَرْ بِالْقَوْلِ فَإِنَّهُ يَعْلَمُ السِّرَّ وَأَخْفَى )
