كتبت: سميرة وجيه
أخصائية نفسية
العلاقات السامة مش دايمًا بتبان من أول نظرة.
في ناس بتدخل حياتنا بهدوء، بكلام حلو، بوعود كبيرة، ونفضل نقنع نفسنا إنهم جايين علشان يسعدونا… بس نكتشف بعد وقت إنهم بياخدوا مننا أكتر ما بيدّونا.
العلاقة السامة مش شرط يكون فيها ضرب أو خيانة… أوقات بتكون كلمة بتوجع، تجاهل مستمر، مقارنة بتوجع القلب، تحكم في أبسط تفاصيلك، أو استنزاف لمشاعرك بدون مقابل.
السمّ بيتسرب بصمت… لحد ما تلاقي نفسك مش عارفة مين أنتي، ولا ليه بقيتي تعبانة طول الوقت، ولا ليه بقيتي بتشكّي في نفسك بدل ما تحبيها.
اعملي وقفة.
اسألي نفسك:
هل العلاقة دي بتضيف لروحي؟
هل بحس بالأمان وأنا مع الشخص ده؟
هل بتكلم براحتي؟ ببكي براحتي؟ بفرح براحتي؟
لو الإجابة “لأ” أكتر من “آه”… يبقى في شيء غلط.
العلاقات الصحية مش كاملة، بس بتكون مريحة.
الشخص اللي بيحبك بحق، مش هيكسر جناحك علشان يمشي جمبك… هيساعدك تطيري حتى لو كان مكانه تحتك.
اختاري نفسك، حتى لو ده معناه تمشي لوحدك شوية.
الراحة في الوحدة أهون من الوجع وسط ناس بتستهلكك باسم الحب.
قولولي… إيه أكتر حاجة ساعدتكم تخرجوا من علاقة مؤذية؟
شاركونا تجربتكم… يمكن تكون النور لحد لسه تايه جوا العتمة.
“صوت الحياة” مش دايمًا عالي…
بس دايمًا صادق.
اسمعيه… هتلاقي نفسك بتناديك.”
