أعدها وكتبها: هند جمال
من اشعار الأستاذ / هشام الجخ
الأصول العالية أمَرِت
والرباية الغالية تَمَرِت
واللي على طبلية ابوه
لو ياكلها بدُقّة جَبَرت
الأصول يعني الصعايدة
مش مجاملة ومش مزايدة
وقفته في الشدة واجب
في المساندة وفي المعايدة
ياللي ماعرفتش صعيدي
فاتك الرجل الحديدي
لو قعد يتقال له حاضر
وِ ان وقف يتقال له سيدي
من سوهاج ولا الأسايطة
ولا من فرشوط يا واسطَى
في المراغة ضيّفونا
اندبح عجلين في طهطا
في الكرم موصوفة داره
في الغرام معروفة ناره
يتعرف من بين كتيبة
بابتسامته وبسماره
لما روحنا المنيا بِتنا
كل بيت في الحي بيتنا
قُلنا كتّرتوا الدبايح
قالوا كرم الضيف هيبتنا
عدّي ع الأقصر حبيبة
تلقَى ناس مافهومش عيبة
من طيابة ناسنا فيها
التاريخ سمّاها طيبة
الأصول يعني الصعايدة
دي الحقيقة مش مزايدة
في المروءة والشهامة
قلبه حامي وناره قايدة
أهل عزم وحيل ما يهدا
والكرم واخدينه فِردَة
لو تعوز رجالة نادي
بلينا وبرديس ودِردَا (جرجا)
عدّي ع الناس العزيزة
مصنع الأخلاق يا جيزة
بدرشين كرداسة ناهيا
كل حتة وليها ميزة
في الصوامعة ونيدة روحنا
طيّبت أخميم جروحنا
وف ساقلتة رجال جبال
والله ردّت فينا روحنا
مش حنلقَى زي دشنا
مهما شفنا ومهما عشنا
عمرهم ما يخونوا صاحب
دولا جيش يتضاف لجيشنا
أهل أسوان مين خابرهم؟
سرهم مافارقش بيرهم
يكبروا ف وش الأعادي
يصغروا قدام كبيرهم
وف بني سويف روح يا ضيف
الكرم واخدينه كيف
مهما تقسى عليه الليالي
كلمته في الحق سيف
ياللي م الفيوم يدوم
بيته عامر كل يوم
في السواقي خيره باقي
وتلاقيه وقت اللزوم
من قنا الحدوتة تبدأ
كلمة الراجل بمبدأ
عمر حق الناس ما ضاع
روح بنفسك شوف وصدّق
كلمته سيف ع الرقاب
مهما بيعجّز شباب
انت بس تقول قناوي
يتفتح لك ألف باب
ياللي رايح ابو تشت كلّم
مركز العائلات يعلّم
بالأمانة لو فاكرني
عدّي ع الهوارة سلّم
وابقى طاطي لنخل إسنا
وارتوي من خير هويسنا
ياما فرسان البوادي
حرنَنِت قدام فارسنا
الصعيد مفهوش عوازل
حمّل الخير وانت نازل
بس حاسب من غضبهم
يقلبوا زي الزلازل
كل نخلة بمَهر غالي
تحكي عن سيرة الهلالي
واللي أصله نخل عالي
يطرح ايه غير نخل عالي
