**صوت الحياة**
تخيل بعد خمسين سنة مثلا . تلاقي منشور في الفيسبوك عن الفنان سعد الصغير ورائعته الخالدة ( بحبك يا حمار )
يقوم واحد يكتب تعليق ويقول .. ياااه على زمن الفن الجميل .. فين ايام سعد الصغير وعماد بعرور وأفلام السبكي ومحمد رمضان . الفن اتبهدل من بعدكم
وتلاقي واحد عجوز قاعد جنب الراديو و بيقول . نفسي اسمع فن قديم و أصيل .. نفسي اسمع ( مفيش صاحب بيتصاحب ) أو ( بوس الواوا ) او ( ركبني المرجيحة حلوة اوي و مريحة ) او ( سيب ايدي )
ويمسح دموعه ويقعد يتحسر على ايام زمان .
او تلاقي مذيع بيقولك والان مع احدى روائع زمن الفن الجميل . الفنان حسن شاكوش واغنية ( اشرب خمور و حشيش ) . ونستمع بعدها الى اغنية ( يا حبيبي ده اللي يخاف من العفريت يطلعلو عو عو عو )
وتفتح التلفزيون في شهر رمضان تلاقي مسلسل من 30 حلقة يحكي قصة حياة ورحلة كفاح الفنان العملاق ( كزبرة ) او ( حمو بيكا ) او (مجدي شطة).
وتطلع اغنية جديدة يقدمها المذيع كالتالي
والان مع اللقاء الفني الذي طال انتظاره .. لقاء السحاب .. كلمات الشاعر باكابورت وغناء الفنان زبالة .. اغنية ( صاحبي غدر بيا ولبسني خازوق ).
تخيلوا في المستقبل انهيار الذوق العام اجمالا وانحطاط الفن كيف سيكون إذا استمر التدهور على هذا المنوال.
