كتبت : هند جمال
بنت الأصول لا تخبى ولا تدارى
واللى فى القلب على لسانها
الكلام الطيب كلامها
والعيبة ماتطلعش منها
لا تكذب ولا تلاوع
ياسلام على سلامة نيتها
الفقر لو ساكن دارها
الحرام مايعرفش سكتها
والكرامة والشرف تاجها
والصبر والرضا راس مالها
حياتها لأرضها ودارها
ووقت الشدة تشيلك على كتافها
دور على بنت الأصول
ولو هتلف المدرية كلاتها
ماتسألش عن غناها وفقرها
دى عشرتها تساوى عزبة بأطيانها
بنت الأصول تعمر بيتك
والبركة تملا دارك بتدبيرها
تتحملك وقت الشدة
وتضحى عشانك بعيونها
تصونك وتصون عيالك
وعلى الأصول يامحلا تربيتها
لا تدارى ولا تخبى عليك
غير شقاها وأوجاعها
بنت الأصول تصون العشرة
لا تبيع ولا تفرط فى راجلها
وإن جار الزمن سدادة
وتشيلك فى ننى عيونها
وكفاية راحة بالك
لو البعاد خدك سنين منها
ترجع تلاقيها صيناك
الجوهرة الأصيلة ماينطفى لمعانها
وأوعى تروح لبنت الخسيس
ولو راكبة الخيل والحرس أدامها
