كتبت: هند جمال
للهيبة ضوابط وروابط، وإياك من الإفراط والتفريط!
في حاجات كتير بتقلّل من هيبة الواحد، منها الهزار بالإيد، فـما تهزّرش مع حد بإيدك.
مش مهم لبسك يكون غالي.. المهم يكون نضيف، وريحتك حلوة، ونَفَسك حلو، خصوصًا وقت الكلام والقرب من حد.
ما تدخلش في مشاكل مع حد إنت حاسس إنه ما يستاهلش، لأنك كده هتعمل راسك براسه وتنزل لمستواه.. ومن الهيبة إنك تتجاهله وتتجنب التعامل معاه، ومنها كمان إكرام لنفسك.
ما تدخلش خناقة مع ست لو إنت راجل وعاوز هيبتك ما تتهزش، وما تدخليش خناقة مع عيل صغير لو إنتي ست وعاوزة تحافظي على هيبتك.
ما تقارنش نفسك بحد.. طالما من جواك شبعان، عمرك ما هتتهز قصاد مخلوق.
ما تقطعش كلام حد غير للشديد القوي، وبعد ما تاخد إذنه كمان.
ما تقدّمش النصيحة غير للي يطلبها بسهولة، حتى لو ما قالكش بلسانه “إنت مالك”، هيقولها بعينيه.
ما تجاوبش على حد ما كلمكش إنت.
اسكت طالما كلامك مش أحلى من سكوتك.. وعود نفسك على السكوت.. اللي بيتكلم حالب، واللي بيسمع شارب، يعني اللي بيسمع بيستفيد أكتر من اللي بيتكلم، وأكيد قيمته وهيبته بتزيد
ما تشكّيش كتير همومك أو قلة فلوسك، الناس بتكره الشكّاي ماديًا أو نفسيًا أو معنويًا، وبتتهرب منه كمان، وصدقني ما فيش أتقل من البني آدم.
ما تديش مواعيد ووعود وتخلفها.. الوعد قيمة الشخص، وشخص من غير كلمة هو شخص من غير قيمة.
ما تنامش وسط الصاحيين، ولو غلبك الهمد غصب عنك، يبقى ما تنامش على بطنك.
ما تتكلمش على غيرك بالوحش في غيابه، عشان غيرك يأمنلك ويطمنلك وما يقلقش منك.
ما تفرضش نفسك على حد.. اللي عاوزك معاه خليك، واللي مش عاوزك، عزّ روحك وما تتمحكش وتتلزّق فيه، وارحل.
ما تقطّرش.. يعني إيه؟ يعني خلي عندك شخصية.. مش كل ما غيرك يغلط في حد، تغلط فيه إنت كمان، وغيرك يقول رأيه، تقول نفس الرأي، حَكّم عقلك وما تبقاش دِيل لحد!
ما تخاصمش على خصام حد، مش معنى إن حد مخاصم غيرك، تقوم إنت كمان تخاصمه.
واجبك مع غيرك هيفضل واجب، طول ما إنت ما جبتش سيرته، وأول ما تجيب سيرته مش هيبقى واجب، ومش هتبقى في نظر غيرك صاحب واجب أو أصول.. اعمل الخير وسيب غيرك يفتكره، ما تفتكرش، ربنا ما بينساش.
سامح، مادام إيد الاعتذار اتمدّتلك.. الكبير دايمًا بيسامح طالما قادر.
ما تضحكش في عزاء.. وما تكشرش في فرح أو رحلة.
ما تعتذرش طالما ما غلطتش، عشان ما يجيش عليك وقت وتبقى عديم الاعتبار ويتداس عليك، وإنت لا غلطان ولا حاجة، وبتتأسف!
ولما تغلط، ما تغلطش بغشومية، عشان لما تيجي تعتذر، ما تهزش صورتك زيادة عن اللزوم.
ما تستلفش كتير.. كتر السلف هيخلّي غيرك يزهق منك ويتجنبك، ومش لازم فلوس، حتى لو شواحن أو هدوم أو أي حاجة.. إلا لو الحد ده ابن أصول، وبينكم ودّ موصول
